Ffederasiwn Cysgod y Foel

Ysgol Bro Tryweryn ac Ysgol Ffridd y Llyn

Croeso i wefan

Ffederasiwn Cysgod y Foel

Ysgol Bro Tryweryn ac Ysgol Ffridd y Llyn

Croeso cynnes i Ffederasiwn Cysgod y Foel, sef Ysgolion Ffridd y Llyn a Bro Tryweryn. Edrychwn ymlaen at eich cwmni yn y blynyddoedd i ddod. Mae’r wefan yma yn cynnig gwybodaeth am y ffederasiwn a'r ysgolion, ei nodau, y cwricwlwm a’r gweithgareddau amrywiol sy’n digwydd yma. Ymdrechwn i sicrhau bod pob plentyn yn teimlo’n hapus ac yn saff yn yr ysgol. Credwn fod y dysgu mwyaf effeithiol yn digwydd pan fo plant mewn lle da yn feddyliol a chorfforol. Pwysleisiwn mai partneriaeth yw addysg rhyngom ni yma a chwithau yn y cartref. Mewn cydweithrediad, gobeithiwn y bydd cyfnod eich plentyn gyda ni yn hapus ac y bydd yn datblygu’n addysgiadol a chymdeithasol. Cymraeg yw prif gyfrwng gwaith a bywyd yr ysgol, ond ein nod yw sicrhau bod y disgyblion yn gwbl ddwyieithog erbyn iddynt drosglwyddo i’r sector uwchradd. Mae pentrefi cyfagos yn ardaloedd naturiol Cymraeg sy’n llawn hanes, ac rydym am ddathlu hynny ym mhob rhan o’n gwaith gan sicrhau fod pob rhanddeiliad, beth bynnag fo’u cefndir, yn gwerthfawrogi cyfoeth ein hanes. Mae’r staff yn y ddwy ysgol yn cydgynllunio, rhannu arbenigedd ac arferion da. Mae hyn wedi cael effaith gadarnhaol iawn ar safon y dysgu ac yn darparu cyfleoedd gwerthfawr i’r disgyblion gydweithio ar brosiectau amrywiol ar y cyd, gan ehangu eu cylch o ffrindiau. Ein nod yw darparu awyrgylch hapus a chysurus ar gyfer eich plentyn er mwyn hybu datblygiad moesol, ysbrydol, diwylliannol a chorfforol. Cyflwynwn amrywiaeth eang o weithgareddau addysgol cytbwys ar gyfer yr holl blant er mwyn eu galluogi i ddatblygu’n ddysgwyr uchelgeisiol, mentrus, annibynnol ac iach. Rydym yn gweithredu polisi drws agored a chyfathrebu agored. Gofynnwn i rieni gysylltu â’r ysgol i drefnu cyfarfod os oes ganddynt unrhyw bryderon, fel y gallwn weithio gyda’n gilydd tuag at ddatrysiad. Os oes gennych unrhyw gwestiynau neu ymholiadau pellach ynglŷn ag unrhyw fater, mae croeso i chi gysylltu ag un o’r ysgolion. Yn gywir, Mrs Awel Mai Jones - Pennaeth mewn gofal